الساحة الفنية المغربية فقدات واحد من أعمدتها الكبار، الفنان محمد الشوبي، لي توفى صباح الجمعة، وهو عندو 62 عام، بعد معاناة مع المرض. كان كيتعالج فالمستشفى العسكري فالرباط وكيتسنى متبرع بالكبد، ولكن القدر سبق كلشي.

الخبر ديال الوفاة علناتو الفنانة والمخرجة لطيفة أحرار فصفحتهـا فـ”فيسبوك”، وكتبت بكلمات مؤثرة: “الله يرحمك صديقي العزيز، تعازيي الحارة لزوجتك عزيزة وأولادك، ولكاع محبيك.”

محمد الشوبي كان من الأسماء الكبيرة فالفن المغربي، خدم فالمسرح، التلفزة، والسينما، وكان معروف بثقافتو وجرأتو فالتعبير على الآراء ديالو. الجمهور المغربي كان كيحترمو بزاف داخل المغرب وحتى فـ الخارج.

فالأيام اللي فاتت، بزاف ديال الفنانين دارو نداء على مواقع التواصل الاجتماعي باش يلقاو ليه متبرع وينقذوه، ولكن للأسف النداء ما وصلش فالوقت.

برحيل الشوبي، كنودعو فنان كبير وملتزم، خلا أثر كبير فالثقافة والفن المغربي، وغادي يبقى فقلوب الناس اللي كتحمل ليه المحبة والتقدير.

إنا لله وإنا إليه راجعون

محمد الشوبي, فنان مغربي, وفاة فنان, الساحة الفنية المغربية, المسرح المغربي, التلفزيون المغربي, السينما المغربية, ثقافة مغربية, أخبار الفن, رحيل فنان, فنانون مغاربة, خبر حزين, نعي فنان,